Ermənistanın ölkəmizə qarşı hərbi təcavüzü nəticəsində Birinci Qarabağ müharibəsində 3 min 890 nəfər Azərbaycan vətəndaşı itkin düşmüş şəxs kimi qeydiyyata alınıb.
Milli.Az Xəzər TV-yə istinadən bildirir ki, onlardan 3 min 171 nəfəri hərbçi, 719 nəfəri mülki şəxsdir.
Əsir və itkin düşmüş girov götürülmüş vətəndaşlarla əlaqədar Dövlət Komissiyasının son məlumatına əsasən, itkin düşmüş şəxslərdən cəmi 54 nəfəri Ermənistan tərəfində saxlanıldıqları vaxt sağ ikən onlarla müxtəlif vaxtlarda Beynəlxalq Qızıl Xaç Komitəsinin nümayəndələri görüş keçirib. Sonradan onlardan 17-sinin meyiti təhvil verilib, 33-nün ölümü barədə məlumat verilsə də, onların meyitləri qaytarılmayıb, 4-ü barədə isə ümumiyyətlə heç bir məlumat almaq mümkün olmayıb.
Birinci Qarabağ müharibəsi dövründə 1480 nəfər azərbaycanlı erməni əsir-girovluğundan azad edilib. Hazırda Vətən müharibəsində itkin düşmüş 6 Azərbaycan hərbçisinin axtarışı davam etdirilir.
Qərbi Azərbaycan icmasının sədri Əziz Ələkbərli deyir ki, Ermənistan bu şəxslərin taleyi və harada olduğu barədə məlumat verməkdən imtina edir. Bu isə onu deməyə əsas verir ki, bu ölkə bu sahədə mövcud olan bütün konvensiyaları saymır.
Mövzu ilə bağlı daha ətraflı videomaterialı təqdim edirik:
Milli.Az
