5 nəfərin ölümünə səbəb olan Mahmuda hökm oxundu – FOTO
![5 nəfərin ölümünə səbəb olan Mahmuda hökm oxundu - FOTO](https://qazi.az/wp-content/uploads/2023/06/5-nəfərin-olumunə-səbəb-olan-Mahmuda-hokm-oxundu-FOTO.jpg)
Aeroport yolunda 5 nəfərin ölümü ilə nəticələnən qəzaya görə ittiham olunan yük maşını sürücüsü Mahmud Əzizovun cinayət işi üzrə məhkəmə araşdırması başa çatıb.
Milli.Az qafqazinfo-ya istinadən xəbər verir ki, Bakı Ağır Cinayətlər Məhkəməsində keçirilən sonuncu iclasda hökm oxunub. Hökmə əsasən Mahmud Əzizova 6 il həbs cəzası verilib.
Xatırladaq ki, hadisə 2021-ci ildə baş verib. 19 yaşlı Əzizov Mahmud Babagözəl oğlu idarə etdiyi “Mercedes-Benz” markalı yük avtomobili ilə Aeroport şosesinin Suraxanı rayonu ərazisindən keçən hissəsində Abdullayev Tahir Ruhulla oğlunun idarə etdiyi “Daewoo” markalı sərnişin avtobusuna çırpılıb.
Qəza nəticəsində yol kənarında dayanan 4 nəfər, eləcə də avtobusdakı sərnişinlərdən biri ölüb. Bundan əlavə 17 nəfər də müxtəlif dərəcəli xəsarətlər alıb.
Hadisəyə görə, yük maşınının sürücüsü həbs olunub. Ona qarşı Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan iki və daha çox şəxsin ölümünə səbəb olduqda) maddəsi ilə ittiham irəli sürülüb.
M.Əzizov həmin vaxt Bakı Mühəndislik Universitetinin ikinci kurs tələbəsi olub.
Milli.Az