Xaçaturyan kimi digər cinayətkarlar da Azərbaycan qanunları qarşısında cavab verəcəklər
Meşəli soyqırımı hadisələri ilə bağlı beynəlxalq axtarışda olan şəxslərdən biri olan Xaçaturyan Vaqif Çerkezoviçin saxlanılması bütün hüquqi normalara uyğundur.
Bu sözləri Trend-ə açıqlamasında təhlükəsizlik orqanlarının veteranı, polkovnik Azər Qarayev bildirib.
A.Qareyevin sözlərinə görə, Meşəli qətliamı ilə bağlı aparılan istintaq zamanı məlum olub ki, Xaçaturyan 1991-ci ildə Meşəli kəndinə basqın edərək 25 azərbaycanlını qətlə yetirmiş, 14 nəfəri yaralamış, 358 azərbaycanlını öz yurd-yuvasından didərgin salmış erməni silahlı cinayətkarları sırasında yer alıb.
“Törətdiyi cinayət əməllərinə görə Xaçaturyan Vaqif Çerkezoviç beynəlxalq axtarışa verilib. Vaqif Xaçaturyan Beynəlxalq Qırmızı Xaç Komitəsinin vasitəçiliyi ilə müalicə almaq adı altında Ermənistan Respublikasına getmək istəyərkən Dövlət Sərhəd Xidmətinin hərbi qulluqçuları tərəfindən Azərbaycan-Ermənistan dövlət sərhədinin Laçın sərhəd-keçid məntəqəsində saxlanılıb. Xaçaturyanın Azərbaycan vətəndaşı olduğunu və qanlı cinayətlər törədilməsinə ciddi əsaslar olduğuna görə onun saxlanılması Azərbaycan qanunvericiliyinə uyğun şəkildə həyata keçirilib.
A.Qarayev əlavə edib ki, Ermənistan tərəfinin məsələ ilə bağlı müxtəlif dezinformasiyalar yaymasının heç bir əhəmiyyəti olmayacaq.
“Azərbaycan hüquqi dövlətdir və Azərbaycanda yaşayan bütün millətlər qanun qarşısında bərbardir. Xaçaturyan Vaqif Çerkezoviç də törətdiyi ağır cinayət əməllərinə görə qanun qarşısına cavab verməldir.
Vətən müharibəsi zamanı döyüş meydanında düşməndən qisasımızı aldıq. Diplomatik meydanda, siyasi arenada və informasiya məkanında isə mübarizə bu gün də davam edir”, – deyə o, əlavə edib.
A.Qarayev qeyd edib ki, təkcə Xaçaturyan deyil, hərbi cinayətkarların, Xocalı cəlladlarının hamısı Azərbaycan qanunları qarşısında cavab verməlidir.
“Beynəlxalq axtarışda olan hərbi cinayətkar Xaçaturyanın saxlanılaraq istintaqa cəlb edilməsi onu deməyə əsas verir ki, digər cinayətkarlar da Azərbaycan qanunları qarşısında cavab verəcəklər”, – deyə A.Qarayev əlavə edib.
Milli.Az
