Azərbaycan bayrağını təhqir etdiyinə görə həbs edilən 3 erməni əsilli futbolçunun Laçın sərhəd-keçid məntəqəsindən deportasiya edilməsinin görüntüsü yayılıb.
Milli.Az həmin videogörüntünü təqdim edir:
Baş Prokurorluğun mətbuat xidmətindən xəbərə görə bu gün həmin şəxslərin tənbeh müddəti başa çatdığından onlar azad olunaraq Baş Prokurorluq və Daxili İşlər Nazirliyi əməkdaşlarının müşaiyətilə Azərbaycan Respublikasının qanunvericiliyinin tələblərinə uyğun olaraq Laçın sərhəd-keçid məntəqəsindən Ermənistan Respublikasına keçmələri təmin edilib.
Qarabağ sakinləri onlara göstərilən humanizmə görə Azərbaycan dövlətinə təşəkkür edərək, həbsdə olduqları müddət ərzində qanunvericiliklə nəzərdə tutulmuş hüquqlarının tam təmin olunduğunu, saxlanma şəraiti və göstərilən münasibətdən razı olduqlarını, hər hansı şikayətlərinin olmadıqlarını bildiriblər.
Xatırladaq ki, Azərbaycan Respublikasının Dövlət bayrağı barədə təhqiredici hərəkətlər etmiş 3 nəfər erməni əsilli futbolçu avqustun 28-də Dövlət Sərhəd Xidmətinin hərbi qulluqçuları tərəfindən Azərbaycan-Ermənistan dövlət sərhədinin Laçın sərhəd-keçid məntəqəsində saxlanılmışdı.
2021-ci ildə bəzi KİV-lərdə və müxtəlif sosial media səhifələrində erməni futbolçuların Azərbaycanın Dövlət Bayrağına qarşı təhqiramiz hərəkətlər etməsinin videoları yayılmışdı.
Bununla bağlı Baş Prokurorluq tərəfindən İnzibati Xətalar Məcəlləsinin 388-1-ci maddəsilə (İnternet informasiya ehtiyatında və ya informasiya-telekommunikasiya şəbəkəsində yayılması qadağan edilən informasiyanın yerləşdirilməsi) başlanmış icraat üzrə onların hər üçü məhkəmənin qərarı ilə 10 gün müddətinə inzibati qaydada həbs edilmişdi.
Milli.Az
