Bu ilin mayında Masallının Təzə Alvadı kəndində yerləşən mağazanın qarşısında 1975-ci il təvəllüdlü Sədaqət Səfərovanı qətlə yetirən həyat yoldaşı, 1964-cü il təvəllüdlü Gülağa Bəndəliyevə hökm oxunub.
Milli.Az qafqazinfo-ya istinadən xəbər verir ki, G.Bəndəliyev Cinayət Məcəlləsinin 120.2.4-cü (Xüsusi amansızlıqla adam öldürmə) maddəsi ilə təqsirləndirilib. Məhkəmənin hökmü ilə ona 18 il müddətinə həbs cəzası verilib.
Qeyd edək ki, hər iki şəxs daha əvvəl ailəli olubmuş və bu, onların ikinci evliliyi olub. Belə ki, yetkinlik yaşına çatmış 4 övladı olan G.Bəndəliyevin həyat yoldaşı 3 il əvvəl vəfat edib. Bundan sonra o, həyat yoldaşından boşanan S.Səfərova ilə evlənib. Onların arasında rəsmi nikah bağlanmasa da, G.Bəndəliyevin evində birgə ər-arvad kimi yaşamağa başlayıblar.
Araşdırmalar zamanı məlum olub ki, G.Bəndəliyevin son vaxtlar mütəmadi spirtli içki qəbul etməsi və digər səbəblərdən ailədə münasibətlər pisləşib, nəticədə S.Səfərova bir ay əvvəl onu tərk edib. Bundan sonra G.Bəndəliyev səhər saatlarında isə S.Səfərova təmizlik məqsədilə xadimə kimi işlədiyi mağazanın qapısını açarkən G.Bəndəliyev ona hücum edib. 59 yaşlı kişi qadını bıçaqlayaraq qətlə yetirib. O, daha sonra özünə də xəsarətlər yetirərək intihara cəhd edib.
Milli.Az
