Bakı Şəhər DYP İdarəsi yağışlı hava şəraiti ilə əlaqədar sürücülərə müraciət edib.
Milli.Az xəbər verir ki, müraciətdə onlardan ehtiyatlı olmağı, yollarda meydana gələ biləcək qəzaların və digər xoşagəlməz halların qarşısının alınması üçün qabaqlayıcı tədbirlər görmək, nəqliyyat vasitələrinin texniki sazlığından əmin olmaq, yola çıxmazdan əvvəl avtomobilin şüşə silgəclərinin və şüşəyuyanların, habelə xarici işıq cihazlarının işlək vəziyyətdə olmasına nəzarət etmək, sürət həddini yol və hava şəraitə uyğun seçmək, zərurət olmadan ötmə əməliyyatı aparmaqdan, qəfil manevr və kəskin tormozlamadan çəkinmək xahiş olunur.
Qeyd olunub ki, yol hərəkətinin ən müdafiəsiz iştirakçıları olan piyadalar da öz növbəsində ehtiyatlı olmalı, yolu onların hərəkəti üçün nəzərdə tutulmayan hissəsindən keçməməli, özlərinin və digər hərəkət iştirakçılarının həyat və sağlamlığına təhlükə yaradan davranışlardan çəkinməlidirlər.
Milli.Az
Xəbərlərimizi WhatsApp kanalımızdan da oxuyun
