Qarabağda yaşayan ermənilərin guya aclıqdan öldüyünü deyərək, dünyanı aldatmağa çalışmaq lazım deyil.
Milli.Az Trend-ə istinadən bildirir ki, bunu Qarabağ “fəal”ı Artur Osipyan “1inam” erməni kanalına müsahibəsində deyib.
Azərbaycanın Qarabağ iqtisadi rayonunda yaşayan ermənilərin ərzaq probleminin olub-olmaması və ərzaq təminatı haqqında şayiələrin həqiqiliyi barədə sualı cavablandıran Osipyan bu xəbərləri təkzib edib.
O, erməni sakinlərin “hökumət”inin 30 il Qarabağı talan etdiyini, “çörək növbələri”nin isə guya Azərbaycan tərəfindən “blokada”nın nəticəsi olmadığını vurğulayıb.
“Həmişə bir tərəf yaxşı yaşayıb, digəri isə çətinliklə çörək pulu qazanıb”, – Osipyan deyib.
Xatırladaq ki, 10 noyabr 2020-ci il tarixli üçtərəfli bəyanata zidd olaraq Azərbaycan ərazisində Ermənistandan erməni hərbi birləşmələri üçün canlı qüvvə, hərbi sursat, mina, habelə hərbi təyinatlı digər vasitələrin qanunsuz daşınmasının qarşısını almaq və aprelin 22-də Ermənistan tərəfindən Azərbaycanla sərhəddə Laçın-Xankəndi yolunun girişində birtərəfli qaydada sərhəd buraxılış məntəqəsinin qurulmasına adekvat olaraq aprelin 23-də Azərbaycan Respublikası Dövlət Sərhəd Xidmətinin bölmələri tərəfindən Azərbaycanın suveren ərazisində Ermənistanla sərhəddə, Laçın-Xankəndi yolunun başlanğıcında sərhəd buraxılış məntəqəsi təyin edilib.
Azərbaycan tərəfindən erməni sakinlərin, Beynəlxalq Qızıl Xaç Komitəsinin (BQXK) və Rusiya sülhməramlı kontingentinin sərhəd buraxılış məntəqəsindən keçidinin təmin olunmasına baxmayaraq, Ermənistan tərəfi ərazilərimizdə qeyri-qanuni fəaliyyətini davam etdirmək məqsədilə, bölgədə saxta “gərgin humanitar vəziyyət” barədə iddialar yayıb. Eyni zamanda, 15 iyun tarixində sərhədçilərimizin atəşə tutulması, qaçaqmalçılığa cəhd edilməsi, yük avtomobillərinin 26 iyul tarixində Azərbaycan ərazilərinə icazəsiz göndərilməsi kimi təxribatlar törədib.
Azərbaycan tərəfindən erməni sakinlərin ehtiyaclarının qarşılanması üçün “Ağdam-Xankəndi” yolundan və digər alternativ yollardan istifadə daxil olmaqla, bir sıra təkliflər irəli sürülməsinə və onların Avropa İttifaqı, BQXK tərəfindən dəstəklənməsinə baxmayaraq, erməni tərəfinin bu təkliflərə qarşı çıxması, alternativ yollara beton maneələr düzməklə əraziyə girişi bloklaması “humanitar vəziyyət” barədə iddialarının siyasi şantajdan başqa bir şey olmadığını göstərib.
Milli.Az
