14 saylı Xəzər seçki dairəsindən Milli Məclis üzvlüyünə namizəd Soltan Məmmədov Mərdəkan qaəsəbəsində seçicilərlə sonuncu kütləvi görüşünü keçirib. Yerli Mədəniyyət Sarayında təşkil edilən görüşə Mərdəkan, Buzovna və Şağan sakinləri ilə yanaşı S.Məmmədovun VI çağırış Milli Məclisdə təmsil etdiyi 12 saylı Xəzər birinci seçki dairəsindən olan bir neçə seçicisi də qatılıb.
Təbliğat prosesinə yekun vurulduğunu deyən S.Məmmədov bildirib ki, təqribən üç həftə ərzində sakinlərlə həm kütləvi görüşlər keçirib, həm də ayrı-ayrı əhali kateqoriyalarından olan seçicilərlə fərdi qaydada təmasda olub, onların evlərinə baş çəkib: “Bugünkü görüşümüz təqribən üç həftə ərzində Mərdəkan, Şağan və Buzovna qəsəbələrində reallaşdırdığımız sayca onuncu kütləvi tədbirimiz idi. Bu tədbirlərin hər biri seçicilərimizlə fikir mübadiləsi, dialoq formatında keçməklə yanaşı, həm seçki platformamızı sakinlərimizə təqdim etmək, həm də onları maraqlandıran suallar və problemlərə cavablarımız və yanaşmamızı bildirmək nöqteyi-nəzərdən pozitiv və məhsuldar praktika oldu”.
Deputatlığa namizəd qeyd edib ki, sakinlərin ünsiyyətə, polemikaya açıq olması səsvermə günü seçici aktivliyinin yüksək olacağına dəlalət edir. “Bu görüşlər həm mənim, həm də komandamızın hər bir üzvü üçün müsbət praktika olmaqla yanaşı, həm də VI çağırış Milli Məclisdəki fəaliyyətimizə dair bir növ hesabat verməmiz baxımından əlverişli imkan idi” – deyə S.Məmmədov vurğulayıb.
Milli Məclis üzvlüyünə namizəd qarşıdakı iki gün ərzində fərdi görüşlərini davam etdirmək niyyətindədir. Avqustun 29-30-da S.Məmmədovun qəsəbə ağsaqqalları, gənclər və qazilərlə görüşləri gözlənilir. Xatırladaq ki, avqustun 10-dan etibarən S.Məmmədovun seçicilərlə Mərdəkanda 4, Şağanda 3 və Buzovnada 3 kütləvi görüşü baş tutub. Bununla paralel olaraq o, yerli şahid ailələrinə baş çəkib, qəsəbələrdə yaşayan tanınmış elm, mədəniyyət, incəsənət və idman xadimləri ilə görüşüb, mədəniyyət ocaqlarını ziyarət edib, ali məktəblərə qəbul imtahanlarında yüksək bal toplamış yerli orta məktəb məzunlarını təbrik edib.
