21-ci əsrin ilk qəhrəmanlıq salnaməsindən-Şuşa zəfərindən danışacağıq. Coğrafiyası və strateji əhəmiyyəti ilə Şuşa həm məğlubiyyətin, həm də Qarabağ zəfərinin zirvəsi demək idi. Şuşanın Azərbaycan ordusu tərəfindən azad edilməsi düşməni sözün əsl mənasına diz çökdürdü. Beləliklə 4 il əvvəl – 2020-ci il noyabrın 8-də Müzəffər Ordumuz Şuşa şəhərini işğaldan azad edərək şanlı tarix yazdı.
Birmənalı demək olar ki, Qarabağ Zəfərinin zirvəsində Şuşa əməliyyatı dayanırdı. Elə bu amalla da qəhrəman əsgər və zabitlərimiz yolsuzluq şəraitində uzun məsafə qət edərək, sıldırım qayalardan aşaraq Şuşaya doğru inamla irəlilədi.
Döyüşlərdə iştirak edən hərbi qulluqçu Trend-ə bildirib ki, Şuşa döyüşləri, bildiyimiz kimi çox sıldırım qayalıqlar və düşmənin gizlənmə bölmələrinin ən çox olduğu bölgələr idi.
“Hansı ki, bizim dost bölmələrimizin irəliləməsi üçün onlara zəmin yaradırdıq. Düşmənin hədəfləri vaxtında dəqiq məhv edilirdi”.
“Tanklarla, digər zirehli texnika ilə silahlanan, əlverişli mövqedə yerləşən düşmənin qarşısına yüngül silahlarla çıxmaq yüksək peşəkarlıq, fədakarlıq tələb edirdi”, – hərbi qulluqçulardan biri deyib.
“Noyabr ayının 3-ü idi. Şuşa ətrafında döyüşlərə başladıq. Ərazi relyefi çətin olduğuna baxmayaraq, ordumuz Şuşa ətrafında döyüşlərə başladı. Ordumuz düşmən mövqelərini ələ keçirdi, düşmən əks hücuma keçməyə başladı. Ordumuz onun qətiyyətlə qarşısını aldı”, – döyüşlərdə iştirak edən digər hərbi qulluqçu qeyd edib.
“İtkilər verərək, şəxsi heyət itirərək, texnikaları itirərək, düşmən geri çəkilməyə məruz qaldı. Ordumuz böyük qürur hissi ilə Şuşa şəhərinə daxil oldu.Şuşada döyüşlərə başladıq. Biz böyük şücaətlə, Şuşa şəhərini noyabrın 8-i günün sonunadək düşməndən azad etdik”, – digər hərbi qulluqçu vurğulayıb.
“Müharibə nə qədər çətin olsa da, bizim tapşırığımız o idi ki, şəhər işğaldan azad olunmalı idi. Düşmən məhdudiyyəti nə qədər olsa da, biz buna baxmayaraq, həmin çətinliklərin öhtəsindən gələ bildik”, – hərbi qulluqçulardan biri bildirib.
Öz növbəsində hərbi şərhçi Ramil Məmmədli Trend-ə bildirib ki, Şuşanın azad edilməsi ordu komandanlığının qarşısına qoyulan əsas tapşırıqlardan biri idi.
“Müharibənin ilk günlərindən Həm Cəbrayılın, həm Hadrutun, Ərgünəş dağının, Məngəlata yüksəkliyinin, Qubadlı və Laçın istiqamətində mövqelərini gücləndirməsi və bir də Səfiyan yaşayış məntəqələrini nəzarətə götürməsi, dolayısı ilə Laçın yoluna, yəni, vaxtilə xəyal kimi görünən bu arzu noyabrın 8-də reallığa çevrildi. Qarabağın döyünən ürəyi olan Şuşa düşməndən təmizləndi.
Beləkilə, 44 gün ərzində döyüşçülərimiz bir addım da geri çəkilmədən yalnız irəli getdi. İkinci Qarabağ müharibəsinin hər günü şanlı bir tarix, misli görünməmiş qəhrəmanlıq dastanı kimi tarixə düşdü”, – hərbi şərhçi əlavə edib.
Qeyd edək ki, Şuşa şəhərinin işğaldan azad edilməsinin dördüncü ili münasibəti ilə şəhərə media-tur təşkil olunub. Müdafiyyə Nazirliyinin təşkilatçılığı ilə təşkil olunan turda media nümayəndləri ilə yanaşı, şəhərin azad edilməsi uğrunda gedən döyüşlərdə iştirak edən döyüşçülər və hərbi ekispertlər iştirak edib.
Milli.Az
